ԱՍՏԾՈՒ ոգին հազարամյա թագավորության ընթացքում հեղվելու է տարբեր ձևերով՝ մարդկության օրհնության համար։ Նա Իր փառքի գիտությամբ լցնելու է ամբողջ երկիրը, ինչպես ջրերը, որոնք ծածկում են ծովը (Ես․ 11:9)։ Նրա զորությունը գործելու է նաև մահացածներին վերստին կյանքի կոչելու համար, քանի որ խոստում կա, «որ արդարների և մեղավորների հարություն է լինելու» (Գործք 24։15)։
ՆՈՐ Ուխտի խոստման մեջ, որը ԵՀՈՎԱ ԱՍՏՎԱԾ կնքելու է նախ Իսրայելի տան, այնուհետև ամբողջ աշխարհի հետ, ասվում է, որ Տերն իր օրենքը գրելու է մարդկանց սրտերում (Երեմիա 31։31-34): Սա նույնպես լինելու է Նրա Սուրբ ոգու ներգործության արդյունքը նրանց կյանքում, որոնք հնազանդվում են Քրիստոսի Թագավորության օրենքներին:
Քրիստոսի Միջնորդական իշխանության և թագավորության ընթացքում Սատանան և նրա ապականված հրեշտակների չար համակարգը կապվելու են 1000 տարի (Հայտնություն 20:2), ուստի նրա ոգին չի մղի մարդկանց սխալներ գործելու:
Փոխարենը նոր սոցիալական կարգի յուրաքանչյուր պայման բարենպաստ կլինի Աստծու արդար կամքը կատարելու համար։ Անշահախնդիր արդար սերը կզբաղեցնի եսասիրության տեղը՝ որպես բոլոր մարդկային գործերի մղիչ ուժ: Մարդիկ կսովորեն, որ ամենամեծ և միակ տևական ուրախությունը գալիս է ուրիշներին բարություն անելուց, այլ ոչ թե եսասիրաբար միշտ սեփական շահերը նախ և առաջ գոհացնելու ձգտումից:
Այսպիսով մարդկային ցեղի ողջ աշխարհայացքն աստիճանաբար կփոխվի, քանի որ Աստծու հոգին պիտի թափվի ամեն մարմնի վրա (Հովել 2:28): Որքա՜ն ուրախ պետք է լինենք, որ այսպիսով Աստծու զորությունը հայտնվում է տառապող ու մահացող ցեղի խնդիրները լուծելու համար։ Երբ մարդիկ ընկալեն, որ Սուրբ ոգու այս հեղումից ստացված օրհնությունները գալիս են տիեզերքի մեծ և ճշմարիտ Աստծուց, երկնքի և երկրի Արարչից, ապա ուրախությամբ փառք կտան Նրան, քանի որ այդ ժամանակ կիմանան, որ Նա իրապես կատարյալ սիրո, արդարության, իմաստության և զորության Աստվածն է:
Օրհնություններ, որոնք կտրվեն բոլորին Աստծու՝ դարերի մեծ ծրագրի համաձայն:
- Բայց կենդանի եմ ես, որ բոլոր երկիրը Եհովայի փառքովը պիտի լցվի: Թվեր 14:21
- Եհովա Աստված պիտի սրբի արտասուքը բոլորի երեսից: Եսայի 25:8, Հայտն. 7:17
- Պատերազմները կդադարեն: Եսայիա 2:4, Միքիա 4:3
- Ամեն չարիք կվերանա: Սաղմոսներ 37:10, Հայտնություն 20:2,3
- Աստծո դատաստանները բոլորին արդարություն կսովորեցնեն: Եսայիա 26:9
- Նրանք չեն վնասի և ոչինչ չեն ապականի: Եսայիա 11:9
- Ճշմարտությունը պիտի բուսնի երկրից: Սաղմոսներ 85:11
- Աստված իր օրենքը կգրի մարդկանց սրտերի վրա: Երեմիա 31:33
- Բոլորը կճանաչեն Նրան փոքրից մինչև մեծ: Երեմիա 31:34
- Երկիրը պիտի լցվի Տիրոջ փառքի գիտությամբ: Ամբակում 2:14
- Աստված իր հոգին կթափի ամեն մարմնի վրա: Հովել 2:28, Գործք 2:17
- Բոլոր անօրենություններն այլևս չեն հիշվելու: Եսայիա 55:7
- Բոլորը կցնծան, երբ տրտմությունն ու հեծությունը փախչեն: Եսայիա 35:10
- Մահ այլևս չի լինի, ոչ սուգ, եվ ոչ աղաղակ.Եվ ոչ ցավ այլևս չեն լինի: Հայտն. 21:4,5
- Ոչ մի բնակիչ չի ասելու. «Ես հիվանդ եմ»: Եսայիա 33:24
- Կույրերի աչքերը և խուլերի ականջները կբացվեն: Եսայիա 35:5
- Երկիրն իր պտուղը պիտի տա: Սաղմոսներ 67:6
- Անմարդաբնակ երկիրը կցնծա ու կծաղկի շուշանի պես: Եսայիա 35:1
- Տիրոջ կողմից փրկագնվածները ետ կդառնան մահվանից: Եսայիա 35:10
- Նրանք չեն կառուցելու, որ ուրիշը բնակվի, նրանք չեն տնկելու, որ ուրիշն ուտի և զուր տեղը պիտի չաշխատին: Եսայիա 65:22,23
- Ամեն մարդ իր որթատունկի ու թզենու տակ պիտի նստի: Միքիա 4:4
- Աստված կշատացնի երկրի պտուղը: Սաղմոսներ 67:6, 85:12
- Օրհնության անձրևներ կլինեն: Եզեկիել 34:26
- Երկիրը կդառնա Եդեմի պարտեզի պես: Եսայիա 51:3
Եսայիա 35
Անապատն ու չոր երկիրը կուրախանան, կցնծա անմարդաբնակ երկիրը ու կծաղկի շուշանի պես։
2 Առատորեն կծաղկի, ցնծալով կուրախանա երգելով։ Նրան կտրվի Լիբանանի փառքը և Կարմեղոսի ու Սարոնի մեծափառությունը։ Նրանք կտեսնեն Տիրոջ փառքը, մեր Աստծու վայելչությունը։
3 Զորացրե՛ք թուլացած ձեռքերը, պնդացրե՛ք դողդոջուն ծնկները։
4 Ասացե՛ք թուլասիրտներին. «Ո՛ւժ առեք, մի՛ վախեցեք. ահա ձեր Աստվածը գալիս է վրեժխնդրությամբ, Աստծու հատուցումով. գալիս է և կազատի ձեզ»:
5 Այն ժամանակ կբացվեն կույրերի աչքերը, կբացվեն խուլերի ականջները։
6 Այն ժամանակ կաղը կցատկոտի եղջերուի պես, և համրի լեզուն կօրհներգի, որովհետև անապատում ջրեր կժայթքեն, և ամայի տեղում՝ հեղեղատներ։
7 Խորշակահար երկիրը լճի կփոխվի, և ծարաված հողը՝ ջրերի աղբյուրների։ Աղվեսների բնակած որջում խոտ կբուսնի՝ եղեգ և կնյուն։
8 Այնտեղ պողոտա և ճանապարհ կլինի, որին սուրբ ճանապարհ կասեն. այդ տեղով անմաքուրը չպիտի անցնի, դա նրանցը կլինի. այդ ճանապարհով գնացողները, հիմարներն անգամ չեն մոլորվի։
9 Այնտեղ առյուծ չի լինելու, այնտեղով գիշատիչ գազան չի գալու. դրանք այնտեղ չեն գտնվելու. բայց փրկագնվածները ման կգան այնտեղ։
10 Տիրոջ կողմից փրկագնվածները ետ կդառնան ու բարձրաձայն երգերով կգան Սիոն, և նրանց գլխի վրա հավիտենական ուրախություն կլինի։ Ուրախության ու ցնծության պիտի հասնեն նրանք, և տրտմությունն ու հեծությունը պիտի փախչեն։
